Teny iditra Hiran-jaza kamboty
Sokajin-teny anarana (lohatenin-tononkalo) [fitanisana]
Mpanoratra Andrianaly Alfred
Lahatsoratra 
Misy maro izao mikalo,
Tsy mba manam-pahavalo;
'Zaho kosa toa mimalo,
Toa latsain'izay mandalo.

Ao ny revo mikorisa
Eny an-dalam-paradisa,
'Zaho kosa mitanisa
Fahorian-tsy hita isa!

Ao ny voky safosafo,
Hafalia-mitafotafo;
'Zaho kosa misakafo
Sady mandry tsy amin'afo!

Ao ny mbola velon-dreny,
Manan-dray hiteniteny ;
'Zaho kosa… voa dia eny:
Singan'olona manjeny .

'Zay tazaniko rehetra
Samy lavitry ny tsetra;
'Zaho kosa manjoretra
Sy mijaly an-tery setra !
'Ndreo ny vorona misiaka,
Miramirana sariaka;
'Zaho kosa toa mifiaka
Ranomaso be mandriaka!

'Rony kintana misosa,
Tsy mba manana mpifosa;
'Zaho kosa! 'zaho kosa
Mitanondrika fa osa!

Volana manatri-tava,
Taratry ny fo mazava;
'Zaho kosa maizin-dava,
Tojo ny oran-tsy misava!

Ô! ry lanitra ô, avoty
Fa mahantra ity kamboty!
Zazabodo diso angoty ,
Vao nitsiry dia voaoty!

Satriko aza anio ihany
Dia hilaozana ny tany,
Ka hisidina hankany
'Lay Fanahy nosimbany.
Voambolana 
Tsanganana sy sary iray takila Ny lohateny rehetra

Nohavaozina tamin' ny 2023/04/02